Қазақстан мен Мысыр 14 күндік визасыз режимді енгізуді жоспарлап отыр
ҚР Мәдениет және спорт министрі Асхат Оралов пен Мысыр Араб Республикасының Қазақстандағы Төтенше және Өкілетті Елшісі Манал Эльшиннави мәдениет және туризм саласындағы ынтымақтастықты талқылады, деп хабарлайды АА «NewTimes.kz» «Казинформ» ХАА-ға сілтеме жасай отырып.
«Биыл Қазақстанда Сұлтан Бейбарыстың 800 жылдығы кең көлемде аталып өтілуде. Ұлы тарихи тұлғаның мерейтойына арналған іс-шаралар бүкіл Қазақстан бойынша өтуде. Алдағы күндері қазақстандық делегация "аз-Захир Бейбарыс" мешітінің ашылуына және Сұлтан Бейбарысқа арналған халықаралық ғылыми-практикалық конференцияға қатысу үшін Мысырға барады. 4 маусымда Каирде біздің әртістеріміздің қатысуымен гала-концерт және Мысырдағы Қазақстанның мәдениет күндеріне арналған қолданбалы өнер көрмесі өтеді. Бұл біздің мәдениет және өнер саласының қызметкерлері үшін өз таланттарын көрсетуге үлкен мүмкіндік», - деп атап өтті Оралов.
Сонымен қатар, тараптар осы жылдың қараша айында үкіметаралық комиссияның VI отырысын өткізуді талқылады.
Манал Эльшиннави ҚР Ұлттық музейінде мәмлүк кезеңіндегі ислам мәдениетінің көрмесін өткізу ниеті туралы мәлімдеді. Іс-шараны биыл ұйымдастыру жоспарлануда. ҚР Мәдениет және спорт министрі бұл бастаманы іске асыруға жәрдемдесуге дайын екенін білдірді.
Туризм саласындағы ынтымақтастық туралы бөлек әңгімелесті.
Манал Эльшиннави Мысыр қазақстандық туристер арасында ең танымал үшінші бағыт екенін атап өтіп, өзара 14 күндік визасыз режимді енгізуге қызығушылық білдірді.
«Бұл мәселені біз де пысықтайтын боламыз. Қазақстанда Мысырдан келген қонақтарға, оның ішінде еліміздің туристік секторындағы инвестициялық жобаларға ұсынылатын көп нәрсе бар», - деп түйіндеді министр.
Жаңалықтар
